A área sanitaria da Coruña supera os 10.000 pacientes con covid

Un de cada cinco casos de covid en Galicia detéctase na área sanitaria da Coruña, que este mércores espertou con case un milleiro de contaxios máis, polo que o número de casos activos sitúase xa nos 10.373.

Segundo o último balance do Sergas, son 61 as persoas que están ingresadas en planta, cinco menos que onte. Hoxe o impacto percíbese na UCI, con 11 pacientes críticos, un máis que o martes.

Con estas cifras, a taxa de positividade sobe case un punto, achegándose ao 21 por certo, ou o que é o mesmo, multiplicando por catro o límite de control da pandemia.

Por outra banda, tamén se está a pedir a colaboración cidadá para evitar aglomeracións nos puntos onde se están a realizar as probas de detección da covid no hospital universitario e tamén no centro de especialidades do Ventorrillo, e deste xeito evitar que os accesos queden colapsados, como sucedeu nas últimas horas, bloqueando o paso aos servizos de emerxencias. 

Insisten en que todos aqueles que estean citados para facer unha PCR ou mesmo un test de antíxenos, deben axustarse á hora que teñen asignada.