A alcaldesa dos Ánxeles declara toque de queda ante tensión por redadas e protestas

A alcaldesa dos Ánxeles, Karen Bass, anunciou este martes que entrará en vigor un toque de queda de emerxencia no centro da cidade a partir desta noite como resposta ao aumento de tensións nas manifestacións, tras as recentes redadas migratorias e a despregadura de tropas federais na zona.

"Parece que a cidade está ardendo. Pero o malestar social limítase a unhas rúas do centro", asegurou Karen Bass,

Esta restrición chega logo de cinco días de protestas na cidade e entrará en vigor esta noite a partir das 20:00 hora local do mércores e abarca aproximadamente unha área de 2.5 quilómetros cadrados.

Bass asegurou que aínda non se definiu canto tempo permanecerá en vigor o toque de queda, aínda que se prevé que se estenda por varios días.

As autoridades decidiron impoñer a medida ante os disturbios e actos vandálicos nocturnos que persisten tras as protestas de parte de grupos que se negan a dispersarse.

"O toque de queda foi considerado durante varios días, pero claramente despois da violencia que tivo lugar onte á noite, 23 negocios saqueados, e xa só ante a natureza extensa e xeneralizada do vandalismo, chegamos a un punto de inflexión e declaramos o estado de emerxencia e pedimos o toque de queda", dixo a alcaldesa nunha conferencia de prensa.

O xefe do Departamento de Policía dos Ánxeles, Jim McDonnell, detallou que os únicos exentos do toque de queda son residentes dentro da área designada, persoas en situación de rúa, persoal de medios acreditados e os traballadores de seguridade pública e servizos de emerxencia.

McDonell tamén sinalou que este martes foron detidas 67 persoas por bloquear ilegalmente a Autoestrada 101 durante a quinta xornada de manifestacións no centro da cidade.

As protestas nos Ánxeles comezaron o venres pola tarde tras as redadas de inmigración por parte do Servizo de Control de Inmigración e Aduanas (ICE).

Trump decidiu enviar miles de soldados aos Ánxeles, a pesar de que as autoridades locais non o solicitaron e acusan o presidente de querer escalar a tensión. 

Unha cidade que Donald Trump cualifica como un "deposito de lixo cheo de criminais".

"Que saiban que estamos arrestando moita xente e que van pasar moito tempo no cárcere", dixo o presidente estadounidense