4.000 mozos españois poden pedir xa os bonos gratuítos para percorreren Europa en tren

A Comisión Europea ofrecerá 40.000 bonos gratuítos, máis de 3.700 en España, para que os mozos poidan percorrer e descubrir Europa viaxando en tren, no marco da iniciativa DiscoverEU, dentro do programa Erasmus+.

Esta nova convocatoria está dirixida a mozos de 18 anos da UE e países asociados ao programa Erasmus+, incluídos Islandia, Liechtenstein, Macedonia do Norte, Noruega, Serbia e Turquía. O prazo de solicitude estará aberto do 8 ao 22 de abril de 2026, segundo informou o Instituto da Xuventude (INJUVE) nun comunicado.

O requisito para presentar candidatura é ter nacido entre o 1 de xullo de 2007 e o 30 de xuño de 2008 (ambos inclusive). As persoas seleccionadas poderán viaxar durante un mes como máximo do 1 de xullo de 2026 ao 30 de setembro de 2027 e recibirán, ademais do bono de viaxe, unha tarxeta con descontos en actividades culturais, transporte e aloxamento.

Entre os 400.000 mozos que xa participaron nesta iniciativa, desde que comezou en 2018, atópase Laura Jarandilla, que percorreu oito países durante 17 días cunha amiga. "Non foi só facer turismo, supuxo a oportunidade de descubrir Europa, de entender cada cultura desde dentro, de desmontar prexuízos, de contrastar o que imaxinabas co que realmente atopas, de vivir os lugares en primeira persoa", explicou.

Delia Alonso, pola súa banda, visitou durante unha semana Francia, Suíza, Eslovenia, Alemaña e Austria, onde asegura que atopou "novas culturas e novos lugares que doutro xeito é difícil coñecer".

Segundo explica o INJUVE, esta iniciativa é "un valioso instrumento para garantir a cohesión social e para lograr os obxectivos marcados na Estratexia Europea da Xuventude 2019-2027, como promover a mobilidade para conectar a mozos de toda a UE e de países veciños e involucrar a mocidade na realidade do continente".