"Por un campo con futuro"; volven as tractoradas en protesta pola situación do agro

Os 500 tractores que se dirixen cara ao centro de Madrid para participar nunha manifestación ata o Ministerio de Agricultura, Pesca e Alimentación avanzan xa pola periferia de Madrid en cinco columnas nas que non se están rexistrando incidentes relevantes.

Baixo o lema "Por un campo con futuro", os agricultores, convocados polas organizacións profesionais agrarias ASAJA, COAG e Unión de Unións -UPA decidiu non participar-, concentráronse en cinco localidades próximas á capital española para iniciar a marcha, que, segundo avanzou, causou tráfico lento e conxestións en zonas polas que circulaban os tractores.

A suba do prezo do gasóleo agrícola e dos fertilizantes son as dúas principais preocupacións do sector.

Unha vez na Praza de Colón, está previsto que a marcha avance desde alí sobre as 11:00 horas e atravese o Paseo de Recoletos, o Paseo do Prado e a glorieta do Emperador Carlos V ata chegar á sede do Ministerio de Agricultura, Pesca e Alimentación.

En Colón espérase representantes de formacións políticas como VOX e o Partido Popular, entre eles, o presidente da Rexión de Murcia Fernando López Miras (PP) e os conselleiros do ramo en Aragón, Arancha Simón, e en Castela e Léon, Joaquín Pino, de Vox.

Fontes do Ministerio de Agricultura, Pesca e Alimentación (MAPA) consideran que a tractorada, un mes antes das eleccións do 29 de novembro, ten un carácter político.

Lembran que o Executivo dispuxo máis de 1.000 millóns de euros de axudas específicas para o sector agrario polo impacto do conflito en Oriente Medio, máis que o resto de países da UE.

A última gran tractorada no corazón de Madrid celebrouse o pasado 11 de febreiro -dúas semanas antes de que arrincase a guerra en Irán.

Ese día, uns 2.500 agricultores e máis de 360 tractores convocados por Unión de Unións e UNASPI protestaron polo acordo comercial de libre comercio entre a Unión Europea e os países do Mercosur.