Rueda anuncia un bono deportivo de 120 euros para menores de 6 a 16 anos

O presidente da Xunta, Alfonso Rueda, anunciou que o Goberno galego incluirá entre as medidas dos orzamentos para o próximo ano un bono de 120 euros destinado a actividades deportivas para os menores de entre 6 a 16 anos.

Nun acto de inicio do curso político, co lema de "Feitos, obxectivos, futuro", explicou que se trata dunha axuda para a práctica do deporte de todos aqueles nenos e nenas federados que servirá tanto para comprar material deportivo, como para acudir a actividades.

Segundo as previsións da Xunta, esta medida, que entrará en vigor en xaneiro cos orzamentos autonómicos, beneficiará a uns 135.000 alumnos.

Esta presentación, na Cidade da Cultura de Santiago de Compostela, contou coa participación de todos os conselleiros e conselleiras, aos que Rueda advertiu de que "non vale conformarse", e neste próximo curso "non pode haber inercias" porque hai que seguir superándose e "facendo política para as persoas".

Coa perspectiva das eleccións autonómicas, que deben celebrarse o ano que vén, o presidente galego dixo que "os retos son moitos" e para afrontalos o Goberno debe "seguir unido" e "centrado", sen distraccións.

Rueda enmarcou a medida do bono deportivo na política educativa do Goberno autonómico e o apoio ás familias para afrontar a "costa de setembro" que supón a volta ao colexio, con gastos non só escolares ante os que cre "unha axuda da Xunta sempre será benvida".

Tamén explicou que a cita deste luns é para "repasar o rumbo" do último ano e "apuntar" os retos de futuro, algo que haberá ocasión de facer con máis detalle no debate sobre o estado da autonomía, previsto para o 9 de outubro, no que se avanzarán novas medidas "dun Goberno que está en marcha para unha Galicia en marcha".

Entre elas, citou que o ano que vén "non haberá subida das peaxes" que son competencia da Xunta, xa que se conxelarán como este ano, e que se seguirá facendo "unha intensa bonificación" do transporte público, aínda que sen especificar máis aló de que se trata de apostar pola intermodalidad que "está a funcionar".

Tras un ano marcado por varios procesos electorais, que algúns partidos aproveitaron para "paralizalo todo", Rueda asegurou que a Xunta segue gobernando "con normalidade" e terá os orzamentos do ano que vén aprobados "en tempo e forma", unhas contas que serán "realistas" e feitas con "sentidiño e prudencia".

Criticou que o Goberno central pon "dificultades" a este labor, ao non facilitar a cifra do teito de gasto, e engadiu que a Xunta volverá reclamar as infraestruturas estatais necesarias na comunidade, como a chegada dos trens Avril, para estender a alta velocidade ferroviaria ás cidades galegas, que "se volve a atrasar incomprensible e intolerablemente".

Ademais, considerou que hai que seguir "apontoando" os resultados económicos dos últimos anos que cualificou de "bos, a pesar das dificultades" e reivindicou a Galicia como unha terra "que non foi nunca de rupturas, pero tampouco de resignación".