Félix Bolaños recoñece que Bruxelas ten "preguntas" sobre a lei de amnistía

O ministro da Presidencia e de Xustiza recoñeceu este luns que a Comisión Europea ten "preguntas" sobre a lei de amnistía e que o Goberno as responde "todas" nun "diálogo continuo, fluído, transparente".

A semana pasada, Félix Bolaños manifestou que a comisión tiña "cero preocupación" por esta norma, unha afirmación que foi rebatida máis tarde polo portavoz de Xustiza do Executivo comunitario Christian Wigand, quen asegurou que aínda non concluíra a análise sobre a lei.

"Estamos a manter un diálogo continuo, fluído, transparente para clarificar calquera aspecto. Ese diálogo desenvólvese con preguntas, con respostas a todas as preguntas que se formulan", asegurou Bolaños tras a reunión que os ministros de Xustiza da UE celebraron en Bruxelas.

O comisario europeo de Xustiza Didier Reynders insistiu en que Bruxelas non se pronunciará sobre a lei de amnistía ata que o texto definitivo sexa aprobado polo Congreso dos Deputados. Mentres tanto, celebraba entrar "nun diálogo construtivo coas autoridades españolas". Un diálogo que enmarcou dentro do costume habitual da Comisión Europea con todos os Estados membros da Unión. "Non é a primeira vez que examinamos un proxecto de lei antes de que se adopte", apuntou Reynders.