Acusan a Cortabitarte de eliminar as comisións de seguridade Renfe-Adif

O exdirector de Seguridade na Circulación do Adif Andrés Cortabitarte -uno dos acusados no xuízo do Alvia- suprimiu as comisións mixtas de seguridade entre Renfe e o Adif, segundo afirmou este mércores Juan Carlos Cañas, actual secretario do comité de empresa de Renfe.

Durante a súa declaración, Cañas cargou contra o Adif e afirmou que o risco que existía na curva da Grandeira correspondía ao administrador ferroviario e non aos traballadores de Renfe.

Sinalou que con carácter xeral o Adif "non pode exportar riscos aos traballadores de Renfe" e que non coñece ningún documento que acredite que Renfe asumía esa exportación.

Ademais, declarou que desde xaneiro de 2008 non existen comisións mixtas de seguridade entre Adif e Renfe, debido a que foron suprimidas polo entón director de seguridade de Adif, Andrés Cortabitarte.

Tamén recoñeceu non coñecer as características específicas da liña na que se produciu o accidente ata que se produciu e que nunca tivo coñecemento de irregularidades na formación de maquinistas.

Respecto á seguridade da vía, sinalou que tanto el como os seus compañeiros da Axencia Ferroviaria Europea vían "inconcibible" que a liña non estivese equipada de maneira "completa" co sistema de control de velocidade ERTMS.

En principio ían declarar tamén un maquinista xefe, delegado de prevención de riscos laborais e condutor e coñecedor desde a inauguración da liña AV/AV082; e un maquinista membro da Comisión de Seguridade na Circulación de Renfe, pero finalmente o avogado de Garzón Amo renunciou a ambas as testemuñas.