Xornada de portas abertas nos Museos Científicos Coruñeses

A Coruña celebra o Día Internacional dos Museos abrindo de balde todos os espazos museísticos da rede municipal, incluídos os tres máis coñecidos, os dedicados á divulgación científica. Entre a Casa dos Peixes a Domus e a Casa das Ciencias sumaron o ano pasado case medio millón de visitantes.

A sala Nautilus alberga unha enorme piscina habitada polos peixes máis grandes do Aquarium Finisterrae. Son as especies que acaparan as miradas e causan máis asombro. Pero estes días todos buscan dúas pequenas quenllas, dous exemplares de musola pinta que acaban de incorporarse a este ecosistema atlántico, cunha adaptación, polo momento, positiva.

" Miramos sobre todo que se adpaten ao medio con respecto aos outros animais, que non os vexan como unha posible presa, sobro todo sendo animais pequenos", expón o cornservador do Aquarium Finisterrae, o biólogo Antonio Vilar. 

Chegaron cedidos dentro dun programa europeo de conservación e cría en catividade desta especie de tiburón e son xa parte da familia do museo científico que esperta máis interese. A Casa dos Peixes, e tamén a Domus e a Casa das Ciencias, celebran  o Día Internacional dos Museos abrindo de balde. É unha oportunidade moi agardada para deixarse sorprender polos museos máis interactivos da Coruña e para xogar coa ciencia.

" Mantemos esa capacidade fomentar o xogo a curiosidade. A interatividade é importante para nós e segue presente en cada nova proposta expositiva", explica Patricia Barciela, directora técnica da Domus.

Tamén é un día especial para as salas de exposicións e para outros museos, como o Arqueolóxico, que programou talleres, visitas guiadas e un concerto que pechará a xornada xa á noitiña.