Xa non hai que levar máscara no transporte público; onde segue sendo obrigatoria?

Hoxe a máscara deixa de ser obrigatoria no transporte público. Tampouco fará falta empregala en establecementos sanitarios como ópticas ou ortopedias, onde se mantivo obrigatoria o ano pasado cando se eliminaron de interiores.

Con todo, hai varios lugares en que Sanidade considera que o seu uso segue sendo indispensable. 

Esta nova medida mantén a obrigatoriedade da máscara nos centros sanitarios, farmacias e residencias de maiores, tanto para os traballadores cando estean en contacto cos residentes coma para os visitantes nas zonas compartidas. Tamén seguirá sendo obrigatoria nas clínicas dentais, de estética e fisioterapeutas.

Ademais, a Sociedade Española de Epidemioloxía non descarta o seu uso. Recoméndase que a utilicen as persoas vulnerables e aquelas que presenten síntomas compatibles coa covid-19 ou calquera tipo de infección respiratoria. Especialmente nos lugares pechados. 

A normativa foi publicada esta mesma mañá no Boletín Oficial do Estado (BOE). Segundo explica a ministra de Sanidade, Carolina Darías, supón "un paso máis" na resposta dada por España en función da situación epidemiolóxica.