Vox queda sen representación en Galicia ao deixar o partido a súa concelleira en Avión

Vox queda sen representantes institucionais en Galicia despois de que Lilian Cerdeira, a única concelleira que tiña en Avión, se dese de baixa do partido.

Con todo, Cerdeira quedará na Corporación como edila non adscrita, tal e como se aprobou no último pleno do mes de abril, segundo confirman a Europa Press fontes do Concello.

Semanas atrás desa sesión, a concelleira presentara un escrito no que informaba da súa baixa do partido de Santiago Abascal por "motivos persoais", de acordo coas mesmas fontes.

Lilian Cerdeira converteuse, nas eleccións municipais de maio de 2023, na primeira e única representante institucional que conseguira Vox en Galicia.

Fontes do partido consultadas por Europa Press, que afirman non ter "ningunha confirmación oficial" sobre a decisión da edila, rexeitan comentar a noticia.