Vecino e Aspas reciben a alta médica e viaxarán a Friburgo
Hugo Álvarez sufriu unha escordadura de nocello e estará uns 14 días de baixa
O centrocampista uruguaio Matías Vecino e o atacante Iago Aspas recibiron este martes a alta médica, polo que estarán ás ordes de Claudio Giráldez para o duelo europeo do xoves contra o Friburgo no Europa-Park Stadion da cidade alemá.
Os futbolistas completaron sen molestias a última sesión de adestramento que o persoal do Celta completou na cidade deportiva Afouteza antes de viaxar a Alemaña. Matías Vecino sufrira unha rotura fibrilar no sóleo da perna esquerda durante a anterior eliminatoria ante o Olympique de Lión, mentres que Aspas arrastraba unhas pequenas molestias no tendón de Aquiles da perna esquerda desde a semana pasada.
O que aínda non recibiu a alta médica é o internacional sueco Carl Starfelt, que esta mañá realizou traballo individual. O central, un dos piares defensivos de Giráldez, regresou cunha lumbalxia de xogar coa súa selección e será dúbida ata última hora.
A mala nova é a lesión de Hugo Álvarez que sufriu unha escordadura de nocello esquerdo lateral de grao II e unha contusión ósea tras a acción que sufriu no partido disputado este domingo ante o Valencia no Estadio de Mestalla.
Na resonancia magnética que se lle practicou este luns, non se revelan lesións maiores polo que o tempo estimado de baixa será de duns 14 días.
