Usuarios da praia de Samil cuestionan a perda de aparcadoiros polas montaxes do Marisquiño

As dificultades para aparcar en Vigo agrávanse estes días, porque as montaxes para a celebración do Marisquiño ocupan unha gran parte dos aparcadoiros da contorna de Samil durante case tres semanas.

Os máis molestos son os bañistas que estaban afeitos a deixar o coche preto da praia. Os que adoitan ir valoran especialmente a accesibilidade deste areal e a súas amplas zonas de estacionamento. Pero desde o pasado día 30 a situación está cambiando bastante, segundo confirman os propios usuarios, porque o acondicionamento para a celebración do Marisquiño vai ocupando cada vez máis espazo. 

"Tes que vir cedo para coller sitio para o coche; se ves as once, xa imposible. Ata as dez aparcase ben, pero logo, ao faltar toda unha zona de aparcadoiro, está complicado". 

O evento, que converte Vigo nun referente internacional dos deportes e as músicas urbanas, celébrase do 7 ao 11 de agosto, pero os preparativos e as desmontaxes posteriores condicionan o uso do espazo unha semana antes e outra despois, para desesperación dos usuarios da praia.  As restricións afectan mesmo ás prazas reservadas para usuarios con mobilidade reducida e a algún dos carrís de circulación da avenida de Samil. Por iso, hai que pide que se busque un espazo máis axeitado para acoller O Marisquiño, coma o recinto feiral de Ifema ou a Madroa. 

"É un reclamo turístico para certa xente, pero eu creo que iso se debería resolver doutra forma". 

As montaxes ocupan tamén prazas para persoas con mobilidade reducida