Alfombras florais de Ponteareas adornarán Madrid na procesión co Papa

As alfombras florais de Ponteareas son moito máis que unha expresión artística: son todo un símbolo, unha manifestación de fe que pasa de xeración en xeración... E que chega tamén ata Madrid.

Este domingo, tras a celebración da Santa Misa na praza de Cibeles que vai oficiar o Papa ás dez da mañá, terá lugar unha procesión do Corpus Christi desde Cibeles pola rúa Alcalá. Nesa procesión destacarán as alfombras de Ponteareas.

"Imos comezar xa o que é a marcaxe, temos que comezar nesta zona desde pa praza de Cibeles e cara arriba. Facemos primeiro a plantilla, marcamos coma sempre con tiza e despois comezamos o perfilado", di un membro da Asociación de alfombristas de Ponteareas.

As alfombras son elaboradas durante horas e precisan a utilización de máis de 30.000 claveis, principalmente brancos e amarelos. Son 16 alfombras de tres metros de ancho ao longo de máis de 500 metros da rúa Alcalá, por onde vai discorrer a procesión eucarística. 

"Hai un tributo ao Papa que nos visita, entón estamos planificando onde van ir as alfombras. Son 16 tapetes en todo o percorrido da rúa Alcalá". "Seis, sete horas nos van levar estar aquí tirados no chan, o bo que temos é que hai bo clima", di outro membro da Asociación de alfombristas de Ponteareas.

Os alfombristas de Ponteareas coordinaron o traballo dos máis de 160 voluntarios que participaron na confección das alfombras, moitos dos membros da comunidade galega residente en Madrid.

A intervención transforma así unha das principais rúas da capital nun grande espazo de arte efímera con composicións que incorporan elementos da iconografía cristiá.