Unha vaga de roubos no barrio coruñés da Zapateira ten os veciños preocupados

Os veciños da Zapateira, na Coruña, teñen medo pola vaga de roubos que padecen dende hai tempo. O último tivo lugar esta fin de semana nesta vivenda da urbanización Breogán. Os ladróns aproveitaron que os propietarios saíron cear para entrar roubar. Accederon ao interior rompendo unha fiestra e levaron todas as xoias que atoparon.

A vítima do roubo asegura que non o está pasando ben. Tampouco o están pasando ben os veciños, din que dende hai tempo hai movementos sospeitosos pola zona.

Teresa Pardo, veciña da mesma urbanización, asegura que non é a primeira vez que sucede. Di que hai furgonetas que fan fotografías ás casas, cre que os están vixiando para saber cando hai xente na casa e para coñecer o nivel de vida.

Os veciños avísanse a través do WhatsApp de calquera movemento sospeitoso; é o mesmo sistema que levan tempo empregando na urbanización Aguas Mansas, a escasos dez minutos. Así e todo non foron quen de evitar os cacos. A finais de xaneiro entraron nunha vivenda da urbanización e levaron varios reloxos. Puido ser máis, pero un veciño colleunos na allada e deu a voz de alarma. Non era a primeira vez que visitaban a zona.

Ignacio Pena, veciño desa urbanización, di que xa se produciron máis roubos, incluso a plena luz do día. Apunta que reciben moitas chamadas ás que non contesta ninguén. Cre que o fan para saber se hai alguén na casa.

A policía nacional e a garda civil están a investigar estes roubos.