Unha modificación estatutaria circunscribe o Dépor exclusivamente ao ámbito do fútbol
A entidade acolleu seccións de hóckey, baloncesto, rugby, boxeo, balonmán, natación, tenis ou xadrez, pero a que máis sona tivo foi a de atletismo
Unha modificación estatutaria aprobada en xunta de accionistas circunscribe o Deportivo exclusivamente ao ámbito do fútbol. Pero na historia non houbo un Deportivo, senón varios.
Se cadra non moitos saben que o Deportivo gañou unha volta a España da man de Julián Berrendero no 42. Naquel equipo ciclista militaban os ponteareáns Delio e Emilio Rodríguez. A entidade acolleu seccións de hóckey, baloncesto, rugby, boxeo, balonmán, natación, tenis ou xadrez, pero a que máis sona tivo foi a de atletismo, que luciu deportistas olímpicos e campións de España nos anos setenta e oitenta como Isidoro Hornillos.
A sección durou ata o ano 88. Desde os noventa, o fútbol é o único rei, como recollen agora os estatutos do club.
