Unha guerreira galaica loce no novo mural xigante da rolda da Muralla de Lugo
A obra, non exenta de polémica, homenaxea a cultura castrexa
Está situada no paseo dos Cóengos, unha das vistas máis emblemáticas da cidade
Tras un mes de traballo, o artista Manuel Pallín rematou un mural de 350 metros cadrados que representa unha guerreira galaica. O graffiti xigante pode verse dende a rolda e dende o adarve da muralla romana, nunha das vistas máis recoñecibles de Lugo.
"Non quería poñer unha muller demasiado delicada, senón cun punto e dozura e á vez forte e con poder, algo que tamén me indicaron de distintas asociacións", di Manuel Pallín, autor do mural.
"Como guía, fago paseos ata de cinco horas pola arte urbana lucense, e estas últimas obras tan ben encadradas dentro do patrimonio entran no circuíto máis habitual das persoas que visitan a cidade", asegura Guido Álvarez Parga, guía turístico de Lugo.
O mural está encadrado nunha das vistas máis recoñecibles de Lugo
O mural homenaxea a cultura castrexa, polo que contén elementos propios da época, como unha arracada, unha fíbula ou un puñal da Idade de Ferro. Para que fose o máis fiel posible, o autor foi asesorado por un arqueólogo e pola directora do Museo Provincial de Lugo.
"Está baseada en elementos reais da cultura material castrexa, concretamente nalgúns obxectos expostos neste museo, coma a arracada de Suegos, o pendente que leva a indíxena prerromana", explica Aurelia Balseiro, directora do Museo Provincial de Lugo.
O proceso de creación do mural non estivo exento de polémica. Ante as críticas polo falta de semellanza ao deseño orixinal, o autor decidiu refacer algúns elementos, como a man ou a cara da guerreira.
"A obra pode parecer terminada, pero logo vou modelando e tomando decisións. É a miña forma de traballo. Exposto ao público, houbo quen pensou que estaba rematado e tiven que poñer un cartel indicando que non era así", di o autor do mural.
Xunto co mural que representa a Xulio César, feito por Diego As e elixido o mellor do mundo de 2021, o novo graffiti xigante conforma un circuíto artístico que rodea a muralla romana.
