Un xuíz ordena ao Goberno o retorno de varios menores repatriados
O xulgado considera que se vulneraron os seus dereitos fundamentais
Un xulgado de Ceuta ordenou á Delegación do Goberno na cidade autónoma que retorne a España a varios menores que foron repatriados a Marrocos o pasado agosto, por entender que se vulneraron os seus dereitos fundamentais.
En concreto, o Xulgado do Contencioso Administrativo número 1 de Ceuta ditou dúas sentenzas, ás que tivo acceso Efe, nas que se ordena á Delegación do Goberno que cese no operativo de expulsión destes menores e "adopte as medidas necesarias para o retorno dos menores de idade repatriados".
Desta forma, o xuíz dá a razón á Fundación Raíces e Coordinadora de Barrios que presentaron recursos en agosto en nome de varios menores marroquís contra o proceso de expulsión daqueles que entraron en Ceuta cruzando a fronteira do Tarajal o pasado maio, durante as avalanchas dos días 17 e 18.
