Un tribunal dos EUA permite aplicar os aranceis de Trump mentres se resolve a apelación

Un tribunal federal estadounidense decidiu que sigan aplicándose os aranceis anunciados por Donald Trump no chamado Día da Liberación ata que se resolva a apelación sobre a decisión do Tribunal de Comercio Internacional (CIT) que ordenaba suspendelos.

Na súa decisión, o Tribunal de Apelación do Circuíto Federal dos Estados Unidos afirma que ambas as partes presentaron argumentos substanciais sobre o fondo e, tras considerar os factores tradicionais de suspensión, chegou á conclusión de que a suspensión está xustificada dadas as circunstancias.

Así mesmo, o tribunal tamén concluíu que estes casos presentan cuestións de excepcional importancia que xustifican unha consideración acelerada en pleno do fondo do asunto en primeira instancia.

Neste sentido, insta aa partes a presentaren conxuntamente unha proposta de calendario de alegacións aceleradas dentro dos dous días hábiles seguintes á súa decisión, co obxectivo de que o tribunal celebre as alegacións orais o próximo 31 de xullo.

O pasado 29 de maio, o Tribunal de Apelacións do Circuíto Federal dos Estados Unidos decidiu acceder á suspensión temporal da sentenza do CIT, que declaraba ilegais a maior parte dos aranceis globais anunciados por Donald Trump ao considerar que este se extralimitou nas súas funcións.