Un incendio en Marín calcina tres vehículos e obriga a desaloxar unha familia

Un incendio no municipio pontevedrés de Marín, na zona de Moledo, calcinou tres vehículos e obrigou a desaloxar unha familia na madrugada do venres.

Segundo informou o Concello de Marín, o suceso produciuse sobre as 02:00 horas deste venres e na zona próxima á empresa Alkimak, ata onde se desprazou a Policía Local e dous camións dos Bombeiros do Morrazo para sufocar as lapas.

Polo sucedido, as catro persoas desaloxadas, da mesma familia, foron atendidas polo persoal sanitario que se trasladou en dúas ambulancias.

Todos se atopaban en bo estado, salvo unha muller adulta que presentaba síntomas de ansiedade pola situación. Así, a familia foi reacollida nun hotel da vila.

Parece que un turismo empezou a arder contra a unha e media da mañá. Esta mañá o propietario estaba a xestionar seguros e comezaba a organizar os labores de limpeza.  Parécelle moi estraño o que pasou e avisou a Policía Científica antes de mover nada.

O fume si entrou no edificio, e acurralou a familia que vive no andar superior, un home e a muller e dous menores de sete e catorce anos. Tiveron que saír polas fiestras da parte de atrás, xestionáronlles unha noite de hotel pero xa atoparon un lugar onde vivir de alugueiro. Os veciños do edificio do lado pasaron unha noite longa e tamén saíron das súas vivendas pola fumareda.