A actitude violenta do acusado dunha violación en Vigo obriga a xulgalo a porta pechada
Enfróntase a unha petición de máis de 16 anos de cárcere
O home non foi detido ata 10 anos despois, logo dun roubo en que o seu ADN resultou coincidente co do violador
Como consecuencia do ocorrido, a muller sufriu un dano psíquico consistente nun trastorno de estrés postraumático. Ademais, produciuse unha agravación doutros trastornos mentais de grao leve
A sección quinta da Audiencia Provincial de Pontevedra, con sede en Vigo, xulgou este martes un home acusado de violar e roubar a unha muller na cidade. Acordou celebrar a vista a porta pechada "por motivos de orde pública", debido á actitude violenta e agresiva do procesado, que nada máis comezar a vista empezou a gritar e proferir insultos, esixindo que non houbese medios de comunicación na sala.
Os problemas comezaron en canto o tribunal iniciara o xuízo e os representantes dos medios de comunicación entraron na sala. Os medios gráficos, seguindo as indicacións da maxistrada, estaban a tomar imaxes desde o fondo da sala, ás costas do acusado, e este comezou a lanzar improperios.
Á pregunta da presidenta sobre se tiña algún problema, o procesado (que veu da prisión da Lama, onde cumpre outras condenadas, e estaba custodiado por dous axentes da Policía Nacional e sen esposar) respondeu a berros: "Si, teño un problema, non quero fotos, non quero que salga nada. Que se vaian!".
A pesar de que a maxistrada lembrou que o xuízo é unha audiencia pública e que non sería fotografado se el non quería, o acusado seguiu gritando e golpeou violentamente un dos asentos onde se atopaba.
Sen deixar de gritar, nun momento dado levantouse da súa cadeira de forma brusca e, en ton airado, dirixiuse aos reporteiros gráficos: "Que estás a gravar? Rómpoche a cámara, me cago nos teus mortos!".
Este home está acusado de violar e perpetrar diversos abusos sexuais e roubar a unha empregada do vello Hospital Xeral de Vigo que saía de traballar ás tres da mañá en 2013. O home non foi detido ata 10 anos despois, logo dun roubo en que o seu ADN resultou coincidente co do violador.
No xuízo non puido prestar declaración a vítima, porque a consecuencia do suceso desenvolveu graves secuelas psíquicas e precisou o ingreso nun centro residencial. Un informe forense fundamentou que non declarase en sala, malia os esforzos do letrado da defensa, quen tamén pediu a libre absolución.
Si declarou a filla da vítima, que estivo acompañada tamén da irmá da muller violentada; as dúas amosaron a súa satisfacción polo desenvolvemento da sesión, aínda que lamentaron que coa súa agresividade o home conseguira evitar a presenza dos medios de comunicación.
A acusación e a fiscalía piden 17 anos de cadea para o home pola violación, agresións sexuais e roubo, e unha indemnización de 96.000 euros. O home xa está no cárcere por outros delitos.
Os feitos
Os feitos, segundo recolle no seu escrito de acusación o Ministerio público, ocorrerían de madrugada no ano 2013, cando o home observou a vítima saíndo de traballar dun hospital vigués.
Cando a muller se dirixía a coller o autobús, el pediulle un cigarro e, con intención de apoderarse do que tivese de valor consigo a vítima, abordouna por detrás, colocándolle un dos brazos por encima do ombreiro, e tapoulle a boca. Así, púxolle un obxecto punzante nas costas ameazándoa, procedendo ela a darlle 15 euros que tiña en billetes e varias moedas.
"Tras isto, conduciuna cara a un lugar máis apartado e, coa vontade de menoscabar a súa liberdade sexual, empuxouna contra o lateral dun vehículo alí estacionado e, de costas a el, o acusado baixoulle os pantalóns e a roupa interior e penetrouna vaxinalmente, mentres lle tocaba os peitos por baixo do suxeitador. Posteriormente obrigouna a que lle realizase unha felación e, como non exaculaba, volveuna penetrar vaxinalmente", engade.
Despois, o agora acusado decatouse de que a muller levaba unha cadea de ouro no pescozo, tiroulle forte dela para arrincarlla e tamén lle levou un anel de ouro e un reloxo e fuxiu do lugar.
Como consecuencia do ocorrido, a muller sufriu un dano psíquico consistente nun trastorno de estrés postraumático. Ademais, produciuse unha agravación doutros trastornos mentais de grao leve.
"O seu estado psíquico en febreiro de 2025 é de deterioración cognitiva grave de perfil frontal, caracterizada por déficits nas funcións cognitivas globais e superiores con repercusión grave sobre o seu funcionamento global, sendo esta patoloxía de carácter grave, persistente e non susceptible de melloría", apunta Fiscalía.
Por todo iso, ademais das penas de prisión, tamén pide para o home o pago dunha responsabilidade civil á vítima de case 46.600 euros polas lesións psíquicas e outros 50.000 en concepto de dano moral.
