Un home acoitela, presuntamente, a seu pai nun pub nas aforas de Santiago

Un mozo foi detido por acoitelar, presuntamente, o seu pai tras atoparse no Pub Casa na estrada de San Marcos, nas aforas da cidade de Santiago. Os homes iniciarían unha lea e tras unha escalada de tensión, o fillo, de 25 anos, agrediría o pai, de 50.

O suceso ocorría entre as 5 e as 6 da mañá deste luns nun local situado na estrada entre Santiago e A Lavacolla. Segundo as testemuñas, os homes atopáronse no pub, onde comezou unha discusión. A pelexa subiu de intensidade e o fillo agrediría o pai cun coitelo.

Para a policía, o altercado foi unha liorta familiar que viña de antes. As diferenzas entre pai e fillo, polo que contan na contorna, non eran novas. Non se falaban desde había tempo. Esta última acabou co fillo, de 25 anos, detido e o pai no hospital. O fillo estaba no local, que fora club de alterne pero que agora, segundo os novos xerentes, é un pub. Era case a hora de pechar, pouco antes das seis da mañá. Só se decataron os clientes que estaban no local a esa hora.

Algunhas testemuñas apuntan a un historial de malos tratos por parte do pai á súa parella e nai do presunto agresor como o que desencadeou a liorta. Detallan que a familia é considerada "conflitiva" e que conta con "denuncias cruzadas por feitos violentos".

Segundo testemuñas, o fillo estaba dentro do local. Seu pai entrou na sala e comezaron unha liorta os dous. O fillo, presuntamente, colleu un coitelo e asestoulle varios cortes ao pai.

Tras recibir aviso dun ferido con arma branca, desprazáronse ata o lugar ata seis vehículos da policía local e da nacional. Tamén se achegou unha ambulancia, que trasladou o pai, con feridas que supoñían risco vital, ata o Hospital Clínico de Santiago. 

Fontes próximas á investigación aseguran que a arma foi intervida e que o mozo recoñeceu os feitos, ademais de confirmar a existencia dunha testemuña.

Pola súa banda, o suposto agresor abandonou o lugar nun vehículo da policía, baixo a custodia dos axentes. Este permanece en dependencias policiais á espera de que lle tomen declaración. 

Os dous, parece, eran clientes habituais do local. A casa familiar está a uns setecentos metros da sala, que abre durante toda a noite. Na contorna non resulta sinxelo atopar veciños que falen da familia implicada, que vive en San Marcos, preto do aeroporto de Santiago. Aseguran que xa protagonizaron outras disputas en varias ocasións.