Un galego, entre os tres mortos nun incendio en Murcia
Un galego, entre os tres mortos nun incendio en Murcia
Os falecidos tiñan 91, 88 e 59 anos.
A vivenda ardeu de madrugada por causas que se descoñecen
O lume comezou de madrugada. Unha das vítimas, unha muller de 88 anos, foi quen deu a voz de alarma desde o seu dispositivo de teleasistencia.
"Empezou sobre as dúas da mañá e por unha chamada de asistencia da señora", conta o alcalde de Ricote Rafael Guillamón. "Deuse parte aos bombeiros e contactouse cun familiar que vive na vila, e non se puido facer nada".
Ademais da propietaria, morreu a súa parella, un galego de 91 anos co que levaba catro convivindo. A terceira vítima é o fillo da muller, de 59.
"El puido saír, pero como non podía sacar a súa nai, abrazouse a ela", contaba unha veciña. Outra sostiña a mesma tese: "Eu creo que si, porque o fillo falecido durmía xusto enriba dela e estaban os dous xuntos debaixo da escaleira abrazados".
Á falta dos resultados das autopsias, todo apunta a que os tres morreron intoxicados polo fume. A policía xudicial aínda non determinou as causas do suceso. O concello de Ricote decretou tres días de loito.
