Un foguete chinés, o responsable das bólas de lume vistas no ceo no sur de España
O espectáculo causouno a cuarta etapa do Jielong-3 ao reentrar na atmosfera
O Observatorio Astronómico de Calar Alto sinala que estes feitos son cada vez máis frecuentes
A reentrada na atmosfera da cuarta etapa do Jielong-3, lanzado pola China o 8 de agosto, xerou o domingo un espectáculo luminoso visible dende varios puntos de Almería e outras áreas do sueste español.
O episodio tivo lugar minutos antes da medianoite, cando varias testemuñas observaron varias bólas de lume atravesando o ceo, deixando un ronsel tras de si.
O fenómeno gravouse dende concellos de Almería coma Roquetas de Mar, As Salinas de Cabo de Gata ou Vera, e dende algúns de Granada, Murcia, Alacant ou as Baleares.
Segundo a Rede de Investigación de Bólidos e Meteoritos (SPMN), este tipo de entradas e fragmentacións poden prolongarse durante minutos e describen traxectorias amplas e rasantes. Neste caso, era lixo espacial proveniente dun lanzamento recente.
O Observatorio de Calar Alto pronunciouse na rede social X, asegurando que o obxecto entrou sobre o Atántico e percorreu máis de 900 quilómetros, alcanzando unha velocidade aproximada de 29.000 quilómetros por hora.
El cohete chino que quiso ser un meteorito 🚀💥
— Observatorio Astronómico de Calar Alto (@ObsCalarAlto) August 11, 2025
10 ago · 21:50 UTC — No fue un meteorito.
Fue la 4ª etapa del Jielong-3 (lanzado 8 ago), entrando sobre el Atlántico a 118 km, +900 km de recorrido y 29.000 km/h.
📡 Fuente: @jmmadiedo.#Jielong3 #Meteorito #BasuraEspacial pic.twitter.com/GGhaRWbw8S
O organismo lembrou que este tipo de episodios cada vez son máis frecuentes, como ocorreu a finais de marzo coa reentrada dun Falcon 9 de SpaceX que deixou unha espiral luminosa no ceo.
