Un condutor sae ileso despois de envorcar nun río do Carballiño
Precipitouse dez metros desde unha ponte sen barreiras de protección
Un descoido puido provocar o sinistro
Custa crer que o home que conducía este coche poida contalo. Sobreviviu despois de envorcar desde dez metros de altura nas frías augas do río Marañao, no Carballiño.
"Cando chegamos ao punto, a persoa xa estaba fóra do coche. Tiña síntomas de hipotermia. O coche estaba totalmente envorcado na auga, el estaba mollado, a noite estaba moi fría e era de madrugada", explica Daniel Caíña Gallardo, sarxento xefe do parque de bombeiros do Carballiño.
O aviso chegou ás cinco da mañá do domingo. Foi o propio sistema de seguridade do coche o que emitiu a chamada ao 112 despois de que saltaran todos os coxíns de seguridade. O condutor perdera o control do vehículo nunha ponte moi estreita da localidade de Mouriz.
"É unha zona moi estreita, a estrada está bastante sucia, e por onde caeu non hai ningunha barreira de seguridade. Hai unha caída de entre dez e quince metros, precipitouse parece ser que por culpa dun descoido".
O vehículo quedou somerxido boca abaixo. Por sorte, o río non levaba moita auga e o condutor logrou escapar a tempo.
"Se o río vai alto e non caes preto da marxe quedas completamente somerxido en pouco tempo".
O sinistro pon de manifesto a perigosidade desta ponte, estreita, sen barreiras nin sinais de perigo, na que un pequeno descoido pode ser fatal.
