Un coche de autoescola envorca no Porto do Son e o seu condutor queda ferido leve
O instrutor que conducía o vehículo de prácticas bateu contra uns morróns, na localidade de Portosín, e o coche quedou na estrada coas rodas cara a arriba
Un coche de autoescola envorcou este martes na localidade coruñesa de Portosín, no Porto do Son, sen que se producisen feridos de consideración a pesar da aparatosidade do accidente.
O sinistro produciuse no centro urbano, na estrada AC-550, que comunica a vila de Noia coa de Ribeira. O vehículo de prácticas ía conducido nese momento por un instrutor que, segundo as primeiras informacións, sufriu un despiste ou quedou durmido ao volante e subiu por uns morróns situados na marxe dereita da estrada.
Tras o impacto cos pivotes o coche envorcou xusto a carón dun parque infantil. A pesar do forte golpe, tras recibir aos primeiros auxilios no lugar do sinistro, só se observaban feridas superficiais no condutor. Malia todo, foi trasladado en ambulancia a un centro hospitalario para realizarlle un exame máis en profundidade.
Por fortuna, neses momentos no había peóns camiñando na beira da estrada, polo que non hai máis implicados no sinistro.
