Un camión precipítase por un terraplén de 15 metros na autovía Ferrol-Vilalba
Os efectivos de rescate tiveron que portar o ferido durante 50 metros ata a autovía, onde recibiu atención médica
Efectivos dos servizos de emerxencias tiveron que intervir este mediodía para rescatar o condutor dun camión que saíu da vía cando circulaba pola autovía Ferrol-Vilalba -a AG/AG-64-, ao seu paso polo municipio lucense de Xermade, e caeu por un terraplén de 15 metros de altura.
Segundo a información facilitada polo Centro Integrado de Atención ás Emerxencias de Galicia (CIAE), o sinistro produciuse ao redor das 13:00 horas, á altura do quilómetro 48, na parroquia de Candamil e en sentido Vilalba.
O 112 Galicia recibiu aviso do sinistro a través da chamada dun particular, quen alertou á central de emerxencias da saída de vía do vehículo, aínda que non puido confirmar se o condutor permanecía ou non atrapado no interior da cabina.
De inmediato, o CIAE mobilizou os Bombeiros de Vilalba, o Servizo de Urxencias Sanitarias de Galicia-061, a Garda Civil de Tráfico e efectivos de Protección Civil.
Unha vez no lugar, os bombeiros comprobaron que o camión descendera polo terraplén e impactara contra varias árbores, que actuaron como freo natural e reduciron a velocidade do vehículo ata deter completamente a súa marcha. A cabina quedou finalmente inclinada e apoiada sobre o arboredo da zona.
Á chegada dos equipos de intervención, o condutor atopábase consciente e non foi necesario realizar labores de excarceración. No entanto, os efectivos de rescate tiveron que portar o ferido durante 50 metros ata a autovía, onde recibiu atención do persoal sanitario e foi evacuado ao hospital de referencia.
