Un avión de transporte militar ruso esnáfrase en Siberia e morren os seus 19 ocupantes
Barállanse varias posibles causas do accidente, que van desde problemas coa bomba de combustible ata un fallo no sistema hidráulico
O avión deixa un ronsel de luz no ceo mentres está caendo a terra. Reuters
Un avión de transporte militar An-12 estrelouse este martes na rexión siberiana de Kémerovo, causando 19 vítimas mortais.
A canle Ren TV foi unha das primeiras en informar sobre o accidente aéreo, no que faleceron 17 persoas que viaxaban a bordo, pero esta información non foi confirmada inicialmente por medios oficiais.
Horas despois, o Ministerio de Defensa de Rusia confirmou o accidente e cifrou en 19 o número de ocupantes da aeronave, falecidos no sinistro.
O gobernador de Kémerovo, Iliá Serdiuk, publicou un vídeo desde o lugar do suceso e sinalou que o avión se estrelara cando sobrevoaba a rexión, sen ofrecer máis detalles.
Segundo a canle de Telegram Baza, barállanse varias posibles causas do accidente, que van desde problemas coa bomba de combustible ata un fallo no sistema hidráulico do aparello.