Un viaxeiro increpa a Óscar Puente nun AVE que atrasa 45 minutos a saída da Valladolid

O deputado socialista e exalcalde de Valladolid, Óscar Puente, que este venres está previsto que volva a replicar o discurso de investidura de Alberto Núñez Feijóo, antes da segunda votación, viuse implicado esta mañá nun altercado no AVE que se dispoñía a coller para ir a Madrid.

Segundo transcendeu, un pasaxeiro que debía ir no mesmo vagón que o deputado do PSOE increpouno e mesmo chegou a empurralo.

Pese ao atraso na saída do tren, Puente chegará a tempo para a última sesión do pleno de investidura prevista este venres a partir das 12:15 horas no Congreso dos Deputados.

Os feitos, adiantados polo xornal Norte de Castilla, ocorreron a primeira hora desta mañá, cando o deputado socialista se dispuña a subirse ao tren de Valladolid a Madrid e un home comezou a increpalo tras preguntarlle que opina do expresidente de Cataluña Carles Puigdemont.

Nese momento inteviñeron traballadores de seguridade da estación e chamaron á Policía Nacional.

A continuación, uns axentes da Policía compareceron no lugar e tomaron testemuño a Puente, ao home que supostamente o atacou e a varias testemuñas dos feitos, o que fixo que a saída do AVE se atrasase.

Nese momento, Óscar Puente pediu que o viaxeiro fose desaloxado, "algo que ocorre sempre que hai incidentes así en avións ou trens" segundo se ve nun dos vídeos do altercado.

Detención hai 15 días 

O home foi detido o pasado 14 de setembro en Valladolid por atentado á autoridade, cando se encarou con dous axentes da Policía Local de paisano e fóra de servizo. De forma paralela, o Colexio de Psicoloxía de Castela e León informou este venres de que este home, Lucas Burgueño, e colexiado desta colexio profesional, exponse a sancións deontolóxicas como consecuencia da súa actitude mostrada no incidente co parlamentario socialista.

Nun comunicado, o Colexio de Psicoloxía detallou que a actitude deste colexiado "está moi lonxe do exemplo que debe dar un profesional da psicoloxía" e explica que xa foi sancionado en dúas ocasións no pasado. O Colexio de Psicoloxía de Castela e León lamentou a actitude de Lucas Burgueño con Óscar Puente, porque esta é "unha profesión enfocada a axudar ás persoas", cuxos profesionais "adquiren os coñecementos necesarios para entender e analizar o comportamento humano e, así, mellorar o desenvolvemento da saúde mental".

O home non chegou a ser detido e viaxou no mesmo vagón que Puente, que, segundo fontes da súa contorna, volveu ser atacado á súa chegada a Madrid.

Puente asegura que denunciará estes feitos, que teñen lugar despois da súa soada intervención no pleno do Congreso do martes, onde interveu por sorpresa en representación do PSOE cargando contra o líder do PP e candidato á investidura, Alberto Núñez Feijóo, e reprochándolle as súas "contradicións". 

Preguntado sobre se estes feitos teñen relación coa actitude de determinados políticos ou partidos, o deputado socialista respondeu que non quere "responsabilizar a ninguén do que son actuacións dunha persoa concreta".

"O responsable é o que se comporta dunha maneira tan incívica. Eu non quero estender a responsabilidade máis aló de quen a ten", engadiu.