Mondariz-Balneario, Ames e Oza-Cesuras; exemplos das particulariedades do mapa municipal galego

Cada un dos 313 concellos galegos ten as súas particularidades. A TVG achegouse ao único concello que queda en Galicia no que hai máis nacementos que mortes; visitamos tamén o que ten o territorio máis pequeno, e outro que se transformou tras a fusión de dous municipios. En cada un deles goberna unha cor política distinta. 

Tranquilidade. É a palabra que máis repiten os veciños de Mondariz-Balneario para definir a vida neste concello. En extensión, é o concello máis pequeno de Galicia. Iso fai que a maioría de veciños se coñezan e que a xestión municipal sexa diferente. O alcalde, César Gil, matiza que
"dar eses servizos básicos non é tan complicado como en concellos con maior dispersión de poboación".

A natalidade é unha das características que destacan no concello de Ames, o único de Galicia onde o ano pasado os nacementos superaron as defuncións. Os veciños apuntan que é un bo sitio para criar os nenos. Blas García, Alcalde de Ames, destaca que "os servizos de conciliación municipal son a gran referencia e fixeron que viñese xente"

Oza-Cesuras xa superou unha década da fusión dos dous concellos. Con todo o alcalde, Pablo González recoñece que se manteñen diferenzas: "A xente de Cesuras ten o seu espírito de Cesuras, e a de Oza dos ríos, o seu. Despois existe unha entidade superior que é o concello de Oza-Cesuras". Esa identidade de cada municipio aínda se nota, se ben comparten servizos.

Estes tres concellos son unha mostra das diferenzas e peculiaridades que existen entre os 313 municipios de Galicia e que nesta xornada fan balance dun ano de mandato.