Un ano despois do naufraxio do Villa de Pitanxo seguen sen clarexar as causas do accidente
As familias din que inspeccionar o barco afundido vai ser clave na investigación
Non houbo un día de descanso para os familiares dos 21 mariñeiros mortos no naufraxio do Villa de Pitanxo.
Pasou un ano e aínda non se sabe con certeza que pasou aquel fatídico 15 de febreiro en augas de Terra Nova.
A investigación segue aberta, e as declaracións dos tres únicos superviventes na Audiencia Nacional son contraditorias.
A versión do patrón e da armadora, que están investigados por homicidio imprudente e por delitos contra a seguridade dos traballadores, apunta a unha parada repentina do motor. Samuel Kwesi, un dos mariñeiros, desmonta esa teoría e mantén que o barco embarrou e que o capitán se negou a cortar os cables, o cal causou o naufraxio.
A pelexa das familias é conseguiren que se inspeccione o barco afundido para intentar clarexar as circunstancias do accidente. E por se houbese algunha posibilidade de recuperar restos dalgún dos doce mariñeiros que nunca apareceron.
Un paso que o Goberno anuncia para o próximo verán.
"Sabemos que está licitado, pero non sabemos nada máis. Non sabemos que se vai atopar e para que pode servir, iso terano que decidir os técnicos e o xuíz. Pero nós pensamos que todo o que se atope ten que utilizarse para saber a verdade", di María José do Pazo, filla dun mariñeiro desaparecido.
"Aínda que pasaron moitos meses hai que facelo, é un punto de inflexión, para nós e para o mundo do mar", di Kevin González, fillo dun falecido no naufraxio.
O que xa se fixo nun laboratorio foi unha reconstrución a escala do naufraxio do Villa de Pitanxo, recreando as condicións en que se produciu. Pero os resultados non se van coñecer ata a última fase da investigación.
