Trump retrátase como vítima no primeiro mitin tras ser imputado

O expresidente dos Estados Unidos Donald Trump (2017-2021) repetiu as súas teorías sobre unha "caza de bruxas" no seu primeiro mitin electoral despois de ser imputado por levar á súa mansión da Florida decenas de caixas con material clasificado.

Trump, que segue sendo o favorito para o nomeamento presidencial republicano das eleccións de 2024, retratouse como unha vítima ante centos de persoas no estado de Xeorxia.

"Esta acusación ridícula e sen ningunha base que lanzou contra min o Departamento de Xustiza de Joe Biden acabará sendo lembrada como o peor abuso de poder da historia do noso país", dixo nun discurso repleto de afirmacións falsas.

O público reaccionou con aplausos ás palabras do exmandatario e non dubidaron en emitir apupos cando o republicano se refería ao actual presidente.

Joe Biden, quen optará á reelección, aínda non se posicionou sobre a nova imputación de Trump, a segunda despois da coñecida no mes de marzo en Nova York por un caso de fraude fiscal.

O venres pasado fíxose público o escrito de acusación da Fiscalía do distrito sur da Florida, no que se detallan os 37 cargos pola presunta comisión de sete delitos federais dos que está acusado o expresidente polo seu mal manexo de material clasificado.

Segundo a Fiscalía, tras deixar o poder en 2021, Trump ordenou trasladar desde a Casa Branca á súa mansión en Mar-a-Lago (A Florida) decenas de caixas con recortes de xornais, cartas, fotos e tamén centos de documentos clasificados, incluída información sobre segredos nucleares e plans de ataque a outros países.

Moitos destes papeis oficiais acabaron almacenados en diferentes recunchos da súa residencia pouco seguros, como un dormitorio, un salón de baile e un baño, segundo mostran fotos incluídas no escrito.

Propiedade do Goberno

A Lei de rexistros presidenciais de 1978 establece que todos os documentos dun presidente son propiedade pública do Goberno Estadounidense e non privada, polo que Trump tiña que entregalos aos Arquivos Nacionais, encargados da súa custodia.

A institución, tras descubrir que non os devolvera, acabou acudindo ao FBI, que abriu unha investigación xudicial e, en agosto de 2022 rexistrou a mansión do expresidente.

Segundo o escrito de acusación, Trump puido poñer en perigo a seguridade do país non só por gardar os documentos en sitios pouco seguros, senón por ensinárllelos a persoas non autorizadas.

En 2021, Trump concedeu unha entrevista a un autor que estaba a escribir un libro e supostamente amosoulle un “plan de ataque” contra un país. Tamén lle amosou a un individuo vinculado á súa campaña electoral un mapa relacionado cunha operación militar.

Por estes feitos, o exmandatario está citado a declarar o martes nunha corte federal de Miami.