Trump minimiza as novas fotos con Epstein publicadas polo Congreso: "Non son gran cousa"

O caso Epstein segue dando que falar.  Apareceron 19 novas fotografías nas que se ve acompañado de rostros ben coñecidos. Aparecen Trump, Clinton, Bill Gates, o director de cine Woody Allen e Steve Bannon. Nas imaxes vese ademais un sobre de preservativos coa cara do presidente estadounidense.

Os documentos están sendo analizados por un Comité de Supervisión do Goberno tras a presión exercida polos congresistas demócratas. Trump asegura que todo é un engano, e di que non hai ningunha irregularidade nas fotografías amosadas.

Trump di que as fotos "non son gran cousa"

O presidente de Estados Unidos, Donald Trump, afirmou este venres que as fotografías relacionadas coa investigación sobre Jeffrey Epstein nas que el aparece, e que foron publicadas hoxe polo Congreso, "non son gran cousa".

Ao ser consultado por xornalistas no despacho oval, o mandatario minimizou as fotos difundidas con insistencia polos demócratas da cámara de representantes, agregando que "hai centos de persoas que teñen fotos con el", e reiterou que non sabía nada sobre as actividades do pederasta, falecido en 2019.

"Todo o mundo en Palm Beach", lugar onde Trump ten a súa residencia de Mar-a-Lago, "coñecía este home", engadiu.

Entre as 19 imaxes publicadas polos demócratas do Comité de Supervisión da cámara baixa destacan as de Trump posando xunto a seis mulleres, ás que se lles tapou o rostro para protexer a súa identidade, outra do mandatario falando cunha muller xunto a Epstein e outra sentado xunto a outra moza.

Os demócratas do Comité din que as 19 fotos son un adianto das 95.000 recibidas.