Tres feridos leves nun incendio propagado nun edificio de vivendas en Nova York

Polo menos tres persoas resultaron feridas leves nun grave incendio que se propagou este martes nun edificio de apartamentos do barrio Upper West Side, en Manhattan, segundo informou o Departamento de Bombeiros da cidade.

O lume iniciouse sobre as 8:20 da mañá hora local nun edificio de seis plantas. Nunha conferencia de prensa, Paul Miano, do Servizo Médico de Emerxencia do Departamento de Bombeiros, indicou que dous residentes e un bombeiro foron trasladados ao hospital por lesións leves.

Ademais, un dos residentes non podía baixar as escaleiras por si só, e tivo que ser rescatado polos bombeiros e o persoal paramédico. O xefe de Operacións do departamento, Kevin Woods, destacou que o edifico afectado non estaba protexido axeitadamente contra posibles incendios.

Pouco despois do inicio do lume, o Departamento de Bombeiros elevou a 4 o nivel de alerta do incendio, do que aínda se descoñecen as causas. As lapas calcinaron a azotea e as xanelas da última planta do edificio, e unha parte ao lado esquerdo da estrutura derrubouse, o que causou unha choiva de entullos sobre a rúa.

O Departamento de Saúde da cidade aconsellou evitar a exposición ao fume pechando as xanelas e reducindo a actividade ao aire libre. A Administración de Emerxencias solicitou autobuses á Autoridade Metropolitana de Transporte para albergar os residentes evacuados.