A cuarta dose contra a covid administrarase a partir do 26 nas residencias de maiores
O reforzo da vacina váiselles pór non só aos maiores de 80 anos, por ser "máis sinxelo, rápido e efectivo", asegura o presidente da Xunta
O Sergas considera reabrir os vacinódromos
Os arredor de 22.000 galegos en residencias de maiores empezarán a recibir a cuarta dose da vacina contra o coronavirus o próximo 26 de setembro, segundo avanzou o presidente da Xunta Alfonso Rueda.
Galicia recibiu confirmación do Ministerio de Sanidade de que contará con case 77.000 vacinas para o comezo da subministración, fixado para ese día, o 26 de setembro.
Así, a Xunta seguirá o fixado pola estratexia nacional, que acordou que primeiro sexan os maiores de 80 anos e despois a franxa de 60 a 80, explicou Rueda.
Con todo, precisou que a administración galega empezará o 26 "vacinando todos os maiores que vivan en residencias, non só os maiores de 80", senón "todos". "Isto fai todo máis sinxelo, rápido e efectivo", resaltou.
"Cando terminemos, empezaremos a vacinar a franxa de 60 a 80 anos", puntualizou. Ademais, a Xunta vaino facer en vacinódromos, "sempre que sexa posible e compatible o seu uso, porque se demostrou que era unha boa medida organizativa", segundo Rueda.
"Esperemos que sexa rápido, e se temos as doses tentaremos rematar canto antes", finalizou.
