Terio Carrera, premio Deporte Galego 2025 ao mellor labor informativo
Ana Peleteiro, Jaime Duro, Susana Rodríguez ou Claudio Giráldez entre o resto de premiados
A gala terá lugar o 29 de outubro e poderase seguir por AGalega
Os Premios Deporte Galego que impulsa cada ano a Xunta de Galicia premian nesta edición de 2025 o xornalista da CSAG Terio Carrera polo seu labor informativo, de ampla traxectoria, seguindo o deporte galego.
Terio Carrera, con case catro décadas de traballo ás súas costas na Televisión de Galicia e na Radio Galega, é un dos rostros máis recoñecidos desta casa, onde segue a presentar os informativos deportivos no Bos días.
Máis premiados
Os Premios Deporte Galego 2025 distinguen tamén a atleta Ana Peleteiro como mellor deportista en categoría feminina e o piragüista Jaime Duro na masculina. Canto aos mellores deportistas con discapacidade na categoría feminina o galardón recaerá na triatleta Susana Rodríguez Gacio e na masculina no piragüista Nicolás Martínez. Ademais, o equipo genuine do Racing Club Villalbés recibirá a distinción como equipo de deportistas con discapacidade.
Pola súa parte, a baloncestista Inés Sotelo e o piloto de automobilismo Christian Costoya serán recoñecidos como mellor deportista revelación feminina e masculino. No caso dos equipos, o Club Balonmán Porriño será distinguido como mellor equipo feminino e o Real Club Celta de Vigo como mellor equipo masculino. O mellor adestrador/a para Claudio Giráldez; ao mellor árbitro/a ou xuíz/a para Zeltia García, xuíza de ximnasia.
O mellor evento deportivo para a proba ciclista O Gran Camiño; a Pescamar na categoría de patrocinio deportivo; ao piragüista Martín Jácome e á Federación Galega de Balonmán na de xogo limpo e á Agrupación Deportiva Baixo Miño na de entidade na promoción do deporte base.
