Tellado presentará denuncia contra o PSdeG por difundir unha fotomontaxe con IA en que aparece con Koldo

 O secretario xeral do PPdeGalicia e cabeza de cartel popular ao Congreso pola Coruña, Miguel Tellado, ameazou este venres con denunciar ao PSdeG tras difundir nas súas redes sociais unha suposta imaxe súa reunido con Koldo García e a súa avogada. Posteriormente, os socialistas retiraron a foto.

"Vémonos nos xulgados. Ata para difamar sodes cutres, Besteiro", trasladou Tellado nun post dirixido ao secretario xeral do PSdeG, José Ramón Gómez Besteiro. Unha mensaxe similar dirixiulle posteriormente ao escritor Suso de Toro, que tamén difundiu a imaxe.

Nos vemos en los juzgados. Hasta para difamar sois cutres, Besteiro.

— Miguel Tellado (@Mtelladof) November 13, 2026

Nos vemos en los juzgados.

— Miguel Tellado (@Mtelladof) November 13, 2026

O PSdeG retirou o chío... Alén de difamar, covardes", agregou o dirixente popular, noutra publicación, esta tarde.

Pola súa banda, consultadas ao respecto, fontes do PSdeG subliñaron que a súa formación non xerou ningunha imaxe, senón que se trataba dunha fotografía que circulaba desde hai días en redes sociais e nalgún medio dixital. 

Ademais, aseguran que retiraron a fotografía porque non tiñan a certeza de que fose verdadeira nin tampouco falsa, e que foi horas despois de que os socialistas borrasen a publicación cando o portal Maldita.es verificou que fora realizada por intelixencia artificial.

Estas fontes explicaron que polo momento non teñen coñecemento da denuncia do secretario xeral do PP, e subliñaron que esperan que este feito non lle exima de dar as explicacións oportunas sobre as reunións do PP coa defensa de Koldo e o pago desta.