Tellado di que Feijóo gobernará en solitario: "Acordos con Vox, si; Vox no Goberno, non"

O secretario xeral do PP Miguel Tellado destacou este martes que o compromiso do líder do seu partido, Alberto Núñez Feijóo, é un Executivo monocor, único e unido, e deixan claro que están dispostos a chegar a acordos con Vox pero non a que esa formación teña ministros no Goberno de España.

"Acordo con Vox, si; Vox no Goberno, non", declarou Tellado nunha entrevista en Onda Cero na que deixou claro que iso non significa que o Partido Popular vaia facer un cordón sanitario á formación de Abascal, como esixen no PSOE.

"Estamos obrigados a escoitarnos e a entendernos"

Despois das críticas de Abascal ao PP por rexeitar ministros de Vox e avisalo de que están a repetir o erro das xerais de 2023, Tellado dixo que non hai por que pensar que Vox non acepte esa postura.

"Ninguén o entendería, nin sequera os seus votantes, e, por tanto, desde unha perspectiva de colaboración con Vox, nós estamos obrigados a escoitarnos, a entendernos", dixo, para reiterar que o mellor para España é un Goberno en solitario do PP.

O número 2 do PP lembrou que el foi o responsable de negociar durante 2023, tras as xerais, o apoio de Vox á investidura de Alberto Núñez Feijóo sen ningunha contrapartida e sen entrar no Goberno porque era a condición sine qua non que lles poñían determinados partidos para poder apoiar a investidura do líder do PP.

"Vox aceptouno naquel momento. E por tanto eu estou seguro de que ese contexto se pode volver dar", manifestou. Neste sentido, aludiu aos datos das enquisas que se están publicando e sinalou que debuxan unha maioría suficiente para gobernar, como a que tiveron no pasado outros presidentes en España para gobernar en solitario.

"A nosa postura é clara: en contra da inmigración ilegal, a favor da inmigración ordenada"

O secretario xeral do PP Miguel Tellado deixou claro este martes que a súa formación non comparte con Vox que haxa que realizar expulsións masivas dos inmigrantes ilegais que se atopan en España.

"Non compartimos a postura de Vox nese sentido", subliñou Tellado , ao ser preguntado polas declaracións de dirixentes de Vox nas que defendían deportacións masivas de migrantes.

Lembrou que existe unha lexislación de estranxeiría no noso país e que o que hai que facer é aplicala: "Hai mecanismos de regularización para todas esas persoas que veñen a España e levan xa tempo convivindo connosco".

Incidiu en que o PP está a favor da inmigración regular e ordenada, entre outras cousas, porque España necesítaa para desenvolver un proxecto social e económico viable.

"A nosa postura é clara: en contra da inmigración ilegal, a favor da inmigración ordenada", salientou o dirixente popular, que explicou que a súa política migratoria se enmarca dentro da política migratoria da Unión Europea.

"O PP está disposto a branquear este discurso xenófobo con tal de gobernar"

En concreto a esta proposta de Vox referiuse o Goberno na conferencia de prensa posterior á xuntanza do Consello de Ministros. A voceira do Goberno Pilar Alegría foi contundente coa formación de Abascal e acusouna de xenofobia: "Non sei por que lle chaman reemigración, cando do que queren falar é de deportacións", afirmou.

Pero quixo referirse en concreto á futura política de alianzas do Partido Popular, ao que acusou de estar disposto a aceptar as propostas de Vox se con iso pode chegar ao poder: "O máis perigoso é que o PP está disposto a branquear este delirio xenófobo con tal de gobernar", asegurou Alegría.

"E dígoo porque escoito agora que o Partido Popular non vai gobernar con Vox; oia, que estamos en San Fermín, non nos Santos Inocentes", concluíu a portavoz do Executivo.