Suspendido o tráfico ferroviario con orixe e destino Vigo polo temporal de choivas
"Debido ás condicións meteorolóxicas, os trens con orixe e destino Vigo non prestan servizo", escribiu Adif na súa conta da rede social X
Segundo informou Renfe, están habilitados os cambios e anulacións de billetes de xeito gratuíto.
O servizo ferroviario con orixe e destino Vigo quedou suspendido debido ás condicións meteorolóxicas, informou este xoves de mañá o Administrador de Infraestruturas Ferroviarias. "Debido ás condicións meteorolóxicas, os trens con orixe e destino Vigo non prestan servizo", escribiu Adif na súa conta da rede social X.
🚨 ACTUALIZACIÓN SERVICIO GALICIA | Jueves 5 de febrero
— InfoRenfe (@Inforenfe) February 5, 2026
⚠️ Debido al temporal de lluvia y viento, se suspende el servicio ferroviario con origen y destino Vigo sin posibilidad de medios alternativos
🚆Trayectos afectados (Alta Velocidad, Media y Larga Distancia):
❌ Vigo…
Isto é derivado das condicións meteorolóxicas adversas, existe risco de inundacións e desprendementos de terras nos traxectos suspendidos. Segundo informou Renfe, están habilitados os cambios e anulacións de billetes de xeito gratuíto.
Tamén se ven afectados os traxectos de Servizos Comerciais que conectan con Madrid no traxecto Vigo-Santiago e Vigo-Ourense. A compañía sinala que irá actualizando a información aos viaxeiros e facendo seguimento do temporal, á vez que indica que activou os cambios e anulacións de forma gratuíta.
Pola súa banda, o servizo transversal Vigo Guixar-Barcelona Sants prestarase desde Ourense. Renfe asegura que o servizo de tren entre Santiago e A Coruña e no resto de conexións non mencionadas se prestará da forma habitual, aínda que pode acumular algunhas demoras debido ao mal tempo e ás fortes choivas previstas en Galicia.
Así mesmo, informa de que despregou persoal en estacións para informar os clientes e irá actualizando a información segundo vaia avanzando o día.
O paso da borrasca Leonardo, que está a deixar importantes precipitacións e vento en case a totalidade da Península, a excepción do nordés, afectou tamén a gran parte do tráfico ferroviario en Andalucía, tanto na rede de alta velocidade e longa distancia como nos servizos de media distancia e Proximidades.
A circulación por estradas tamén se está vendo afectada, con 116 estradas pechadas ao tráfico, 100 polas intensas choivas e inundacións e 16 pola neve, segundo informou a Dirección Xeral de Tráfico (DXT).
