Suecia detecta unha segunda fuga de gas no Nord Stream 2

A garda costeira de Suecia detectou unha segunda fuga de gas no gasoduto ruso Nord Stream 2, que se suma ás tres detectadas nas dúas tubaxes entre o domingo e o luns, que as autoridades de Dinamarca e Suecia investigan como sabotaxe.

A cuarta fuga, de menor tamaño, atópase na zona exclusiva económica sueca e no Nord Stream 2, segundo informou ao diario Svenska Dagbladet Jenny Larsson, portavoz da Garda costeira. "Trátase dunha vertedura grande duns 900 metros de diámetro e outra menor, duns 200 metros", afirmou esa fonte.

O descubrimento fixérono hai un día durante unha patrulla das autoridades suecas, que do mesmo xeito que as danesas supervisan con barcos e avións a zona, aínda que non fora difundido ata o de agora.

En total hai dúas fugas en cada gasoduto, dúas na zona danesa e dúas na sueca, en augas internacionais. Tanto os gobernos de Suecia e Dinamarca coma o de Alemaña e a Unión Europea atribúen eses escapes a unha sabotaxe cuxa orixe está a ser investigada.

A investigación das fugas avanza lentamente debido a que continúa saíndo gas das tubaxes, e iso impide o achegamento á zona. A Dirección Xeral de Enerxía danesa informou onte de que saíu máis da metade do gas das tubaxes e o fluxo podería deterse este domingo.

A policía danesa investiga o incidente, do mesmo xeito que ocorre en Suecia, onde a Fiscalía para cuestións de seguridade asumiu o caso, tipificado xa como sabotaxe grave, e nas indagacións colaboran os servizos de intelixencia suecos. Os sectores eléctricos e gasísticos de Dinamarca e Suecia elevaron o nivel de alarma sobre as súas instalacións con motivo das fugas, e o mesmo fixo a veciña Noruega, a pesar de que non ten costa no Báltico, incluíndo presenza militar.