Starfelt, case descartado para o duelo contra o Friburgo

O internacional sueco Carl Starfelt segue sen exercitarse cos seus compañeiros a dous días do decisivo duelo europeo contra o Friburgo, polo que o defensa, un dos piares de Claudio Giráldez, ten moi difícil reaparecer ante o conxunto alemán. A lesión do central nórdico, que regresou cunha lumbalxia de xogar coa súa selección a repesca para o Mundial, esnaquizou o sistema defensivo do Celta.

Os números non enganan. Sen Starfelt, o equipo celeste encaixou 12 goles nos últimos catro partidos oficiais. A primeira suplencia europea de Starfelt chegou en Bulgaria, onde o Celta se pegou o primeiro tortazo na liga Europa. O Ludogorets, con tres goles de Petar Stanic, situou no punto de mira aos mozos Manu Fernández e Yoel Lago, os elixidos ese día por Giráldez para formar no centro da defensa.

Os outros dous partidos que non disputou o sueco na competición continental foron contra o Estrela Vermella e Friburgo. En ambos, o Celta tamén encaixou gol. Asinou táboas en Belgrado e saíu goleado do Europa-Park Stadion da cidade xermana.

Pese ao esforzo dos servizos médicos por acelerar a recuperación do defensa, Starfelt está case descartado para a volta dos cuartos de final da liga Europa. A boa noticia para Giráldez é que o extremo Hugo Álvarez xa fixo parte do adestramento co grupo tras mellorar da escordadura de nocello que sufriu o 5 de abril fronte ao Valencia en Mestalla.