Unha nave abandonada de Oleiros sofre o segundo incendio nun mes

Parcialmente calcinada. Así quedou unha nave abandonada na zona de Maianca, en Oleiros, tras sufrir un segundo incendio nun mes.

Nela amoreábase diverso material, como ferralla ou pneumáticos, e ata un vehículo. Ao lugar desprazáronse pouco antes da medianoite os bombeiros de Arteixo e tamén o servizo de Emerxencias de Oleiros.

Atoparon varios focos de lume na nave, polo que todo apunta a que foi intencionado. A cuberta de uralita tamén quedou calcinada, polo que agora a nave corre o risco de caída. 

Os equipos contraincendios empregaron dez mil litros de auga en sufocar as lapas en algo máis de dúas horas.