Santos Cerdán, ao xuíz: "Non levei nin un euro, nin o Partido Socialista tampouco"

O exsecretario de Organización de PSOE, Santos Cerdán, declárase "inocente" e nega todas as acusacións que contén o informe da UCO relacionadas co cobro de comisións por adxudicacións de obra pública. "Nunca levei un peso" e "tampouco houbo financiamento do PSOE", destacou na súa declaración ante o xuíz o pasado luns día 30.

"Considérome inocente e quero deixar claro que eu non levei nin un euro, nin o Partido Socialista tampouco", afirma. "O único delito que cometín é traballar para formar un Goberno de coalición de esquerdas".

Na súa declaración, insistiu: "Nunca levei un peso, tampouco houbo financiamento do PSOE". "Aí están as miñas contas, reiterou. O meu patrimonio é clarísimo". Ao seu xuízo, estamos ante unha "persecución política". Tras escoitar a súa intervención, o xuíz enviouno a prisión provisional sen fianza.

Santos Cerdán, exnúmero tres do PSOE, recorreu o seu ingreso en prisión nun escrito no que se considera vítima dunha "causa xeral" contra el na que se lle enviou a prisión sen que existan indicios da súa presunta actividade delituosa co único fin de "provocar" unha confesión, como ocorreu no seu día co comisionista do caso Koldo, Víctor de Aldama.