Sanidade aproba un fármaco que reduce o colesterol con dúas doses ao ano

O Ministerio de Sanidade aprobou o financiamento no Sistema Nacional de Saúde do primeiro e único tratamento que proporciona unha redución eficaz e sostida do colesterol con dúas doses ao ano.

Segundo informou a farmacéutica Novartis, o principio activo de Leqvio proporciona unha redución eficaz e sostida de colesterol nun 54 % de pacientes con enfermidade cardiovascular arterosclerótica, engadido á dose máxima tolerada de estatinas e cunha administración de mantemento mediante inxección subcutánea dúas veces ao ano.

O medicamento interfire co ARN e limita a produción dos niveis de LDL (colesterol malo). Coa súa administración os pacientes con hipercolesterolemia poden regular os seus niveis de colesterol en sangue por baixo do 100 mg/dl.

O colesterol é unha graxa natural que circula polo sangue, pero se os niveis son máis altos de 200 mg/dl pode provocar enfermidades cardiovasculares, que son a primeira causa de morte en España.

Segundo datos do INE, en 2021 morreron 119.196 persoas por mor destas enfermidades, un 26,4 % do total dos falecementos. Ademais, as enfermidades cardiovasculares son a primeira causa de hospitalización (12,9 %) en 2021, con 582.446 ingresos en hospitais públicos.