Sánchez: "Era de sentido común resolver o problema na lei do 'só si é si'"

O presidente do Goberno, Pedro Sánchez, defendeu este martes a reforma da lei do 'só si é si' ante o problema xurdido na súa aplicación e, aínda que volveu cualificala como unha boa norma, sinalou que era "de sentido común" resolver o "problema" para que no futuro non se volva a producir nin unha soa rebaixa de condena.

Na súa intervención no Congreso ante o grupo parlamentario socialista, o presidente volveu a defender a Lei de garantía integral da liberdade sexual como unha "boa lei" que supón un avance en dereitos das mulleres e ante a que "poucos propugnan xa unha volta atrás", pero que tivo "algúns efectos indesexados" na súa aplicación.

Unha lei que xorde, remarcou, dunha ampla reivindicación feminista, que pretende "garantir que calquera forma de agresión sexual sexa perseguida, sen culpabilizar nunca máis a vítima, e que sitúa no centro de calquera relación o consentimento explícito por parte da muller".

Ninguén, dixo, nin o Goberno nin os grupos e deputados que a aprobaron tiveron como obxectivo que se rebaixasen condenas a ningún agresor sexual, nin era o propósito da lei, pero o certo "é que existe un problema porque se produciron algunhas rebaixas" de condenas.

Ante esta situación preguntouse que se fai cando se expón un problema na aplicación dunha lei. "A resposta é utilizar o diálogo, pero resolver o problema. Imos facer o que hai que facer, o que é de sentido común, o correcto, que é defender o grande avance que é a lei e tamén corrixir o problema", afirmou.

Sánchez reivindicou o compromiso histórico do PSOE co movemento feminista e os avances que se lograron en igualdade con este Goberno. 

Pero a reforma desta lei está xerando problemas dentro da coalición. Este martes, o Ministerio de Xustiza acusaba ao de Igualdade de estar "confundindo á opinión pública". Referíase a ministra Pilar Llop a declaracións como as feitas pola delegada do Goberno contra a Violencia de Xénero, Victoria Rosell, quen apuntou que a proposición de lei rexistrada polo PSOE no Congreso "pode dar lugar a revisións por parte de tribunais que ata agora non revisaron".

A ministra de Xustiza asegurou, nunha entrevista na Cadena Ser, que as rebaixas continuarán mentres non se modifique a actual lei. Defende, ademais, o endurecemento dunhas penas que agora considera insuficientes. "Non é de recibo que unha agresión sexual violenta sexa máis barata que un roubo", dixo Pilar Llop.

Dende o grupo confederal de Unidas Podemos aseguran que iso é falso. O seu presidente, Jaume Asens, cualifícao de "discurso que alimenta o populismo punitivo".

Por outra banda, o voceiro de Unidas Podemos, Pablo Echenique, confirmaba hoxe que o PSOE non chamou o seu partido "dende que romperon unilateralmente a negociación".

Si chamou o PSOE os partidos da investidura, que xa analizan o texto ao tempo que critican as formas. Para Íñigo Errejón, de Más País, "é un despropósito que o Goberno traia normas por separado". Joan Baldoví, de Compromís, pídelle aos socios de Goberno "que presenten un texto acordado". Pola súa parte, Gabriel Rufián, de ERC, asegurou que a súa formación non vai entrar "en guerras dentro da coalición porque todo o mundo sabe que aquí hai un ano electoral"

Dende o PP seguen ofrecendo os seus votos para unha reforma urxente da lei ao tempo que critican o "xiro de guión que deu Sánchez, pasando ao ataque contra unha parte da coalición". Para a súa voceira no Congreso, Cuca Gamarra, "a sociedade española volve ver como en vez de ter un goberno preocupado por intentar arranxar o que aínda se pode arranxar, seguen discutindo".