Sánchez avisa a dereita tradicional de que pode acabar "nas fauces" dos ultras
Na clausura do congreso do Partido Socialista Europeo acúsaa de se converter nun "satélite" da extrema dereita
O presidente do Goberno, Pedro Sánchez, acusou este sábado a dereita tradicional europea de estar a se converter nun "satélite" da ultradereita durante a clausura do congreso do Partido Socialista Europeo celebrado en Amsterdam.
"Eles copian as súas ideas e as propostas e imitan os seus métodos. Pero, por que o fan? Na miña opinión, porque pensa que é a súa única oportunidade de sobrevivir politicamente. Non pode ser máis inxénua", asegurou.
De manteren esa política de seguidismo, Sánchez advertiulle que podería acabar nas súas "fauces", para o que citou o expresidente dos Estados Unidos, John F. Kennedy.
"No pasado, aqueles que de xeito tolo buscaron o poder cabalgando a lombos dun tigre, acabaron dentro del".
Gran parte do seu discurso estivo centrado no risco da ultradereita e na actitude da dereita tradicional, que, segundo dixo, ataca dereitos conquistados socavando os cimentos da democracia.
"Cando atacan os dereitos conquistados, están desmantelando as verdadeiras bases da democracia".
Ante este rumbo, instou a socialdemocracia a responder de xeito unido. O congreso reservoulle un papel relevante a Pedro Sánchez ao ser un dos xefes de Goberno europeos da familia socialista.
