Sánchez e Von der Leyen desbotan que as eleccións poidan interferir na presidencia española da UE

Foto de familia do Goberno co Colexio de Comisarios Europeos desde a Galería das Coleccións Reais para inaugurar oficialmente a presidencia española do Consello Europeo. Un semestre na recta final do mandato comunitario con retos pendentes, como pechar o pacto de migracións e asilo, avanzar na transición enerxética ou reducir a vulnerabilidade da economía europea fronte a outras potencias.

"Imos actuar como un intermediario imparcial, que é o que nos corresponde, facilitando acordos, coordinando debates construtivos, impulsando os expedientes que sigan abertos", asegurou o presidente do Goberno español.

"Este último treito ás veces é o máis dificil. Por iso me comprace contar coa dedicación e o liderado de España", dixo Ursula Von der Leyen.

A presidenta do executivo comunitario e o do Consello Europeo coinciden en que as eleccións en España non teñen por que condicionar os obxectivos do semestre.

"Absoluta normalidade. Non é a primeira vez que durante unha presidencia dun determinado país se celebran eleccións", afirmou Sánchez.

"Independentemente do resultado das eleccións, confío en que o Goberno español e as institucións sexan quen de ter unha presidencia eficaz. E confío no espírito europeo de España", asegurou Von der Leyen.

Sánchez evitou responder neste escenario institucional unha pregunta sobre o avance da ultradereita en Europa. Si o fixo Von der Leyen. Di que ante os extremismos de esquerda ou dereita hai que demostrar firmeza e ofrecer confianza nas políticas realistas.

O Partido Popular destaca a ausencia en Madrid de dez comisarios no inicio da presidencia española. Culpa destas ausencias a Pedro Sánchez por usar de xeito partidista, din, todo o que vén de Bruxelas.

"A presidencia española da Unión Europea estase vendo deslucida no seu comezo polo burdo intento por parte de Pedro Sánchez de utilizar electoralmente todo o que lle veña de Bruxelas. Hoxe veu a Madrid a Comisión Europea e foi unha visita moi deslucida porque tivo un récord de ausencias de comisarios", aseguraba Esteban González Pons, vicesecretario de institucional do PP.