Rusia e Belarús inician exercicios militares en plena tensión con Polonia e a OTAN

Rusia e Belarús comezaron este venres os exercicios militares estratéxicos Zapad-2025 en ambos os países no medio das graves tensións con Polonia e a OTAN pola recente incursión de drons rusos no espazo aéreo polaco.

"A accións prácticas das tropas terán lugar en polígonos militares de Belarús e Rusia e mais nas augas dos mares Báltico e de Barents", precisou o Ministerio de Defensa de Rusia ao anunciar o comezo dos exercicios.

 

O Kremlin negou que as manobras militares ruso-bielorrusas Zapad-2025, as primeiras deste tipo desde o comezo da guerra en Ucraína, estean dirixidas contra terceiros países.

"Non están dirixidas contra ninguén. Trátase da continuación da cooperación militar e a mellora da interacción entre dous aliados estratéxicos", dixo o xoves o portavoz da Presidencia rusa, Dmitri Peskov.

Os exercicios, que se celebran principalmente en polígonos militares en Borisov, preto da capital bielorrusa e a uns 450 quilómetros da fronteira polaca, teñen como obxectivo declarado o reforzamento da seguridade militar da Unión Estatal Rusia-Belarús fronte á ameaza da OTAN.

En principio, participan moitos menos soldados que en 2021, cando se informou de 200.000 participantes, aínda que non só haberá militares rusos e belarusos, senón tamén doutros países como India e Irán.

Armas nucleares e mísiles balísticos

As manobras, que concluirán o próximo día 16, inclúen a simulación do lanzamento de armas nucleares e mísiles balísticos hipersónicos Oreshnik, segundo informou o Estado Maior belaruso.

Belarús, o principal aliado de Rusia na guerra de Ucraína, asinou un acordo de seguridade con Moscova a finais de 2024, tras o cal o líder ruso Vladimir Putin adiantou a posibilidade de despregar mísiles Oreshnik en territorio do país veciño na segunda metade deste ano.

Entón, Putin asegurou que o seu país está disposto a defender Belarús con todas as forzas á súa disposición, incluídas as armas nucleares tácticas que Moscova emprazou en territorio do país veciño tras o comezo da guerra en Ucraína.

O Oreshnik, de alcance medio, que pode portar oxivas nucleares, podería teoricamente golpear obxectivos situados mesmo a miles de quilómetros de distancia cunha marxe de erro de apenas unas poucas decenas de metros.

O primeiro ministro polaco Donald Tusk, cuxo país pechou a fronteira con Belarús, asegurou que os Zapad-2025 simularán a toma do chamado Corredor de Suwalki, unha franxa de poucas decenas de quilómetros de ancho que é o único nexo terrestre entre os países bálticos e Polonia.

A OTAN non ve "unha ameaza inmediata"

A OTAN instou este venres a Rusia e Bielorrusia a actuar de maneira "predicible e transparente" no que se refire ás manobras conxuntas que iniciaron os seus exércitos .

"Instamos a Rusia e Bielorrusia a que actúen de maneira predicible e transparente, en consonancia cos seus compromisos internacionais", indicaron a EFE fontes aliadas, que en todo caso precisaron que non ven "ningunha ameaza militar inmediata contra ningún aliado da OTAN".

Agregaron que a Alianza Atlántica "segue moi de preto a actividade militar de Rusia".

"O Kremlin demostrou sistematicamente unha falta de transparencia, tamén no que respecta ao tamaño e o alcance das súas manobras. É ben sabido que utilizou as manobras militares para aplicar políticas coercitivas", comentaron.

O Ministerio de Defensa de Bielorrusia advertiu de que reaccionará ante "calquera provocación" durante esas manobras estratéxicas.

Polonia, que pechou a fronteira con Bielorrusia por un prazo indefinido, concentrou nesa zona varias decenas de miles de tropas.