Polonia repele coa axuda da OTAN drons rusos "nunha agresión sen precedentes"

As defensas aéreas da OTAN axudaron a Polonia a derrubar os drons rusos que esta madrugada invadiron o espazo aéreo polaco, informou a Alianza Atlántica nunha mensaxe en redes sociais.

"Numerosos drons entraron no espazo aéreo polaco durante a noite e atopáronse coas defensas aéreas polacas e da OTAN", dixo a portavoz da organización militar, Allison Hart, nunha mensaxe en redes sociais e engadiu que o secretario xeral, Mark Rutte, está en contacto coas autoridades polacas.

Polonia denunciou este mércores un acto de agresión tras a violación do seu espazo aéreo sen precedentes de drons rusos durante a madrugada, que obrigou a pechar varios aeroportos e a convocar de urxencia unha reunión da Asemblea de Seguridade Nacional.

 As autoridades polacas atoparon restos dun mísil de orixe descoñecida, que podería ser un dos utilizados polo seu exército, e de sete drons. 

Rusia di que non buscaba atacar obxectivos no territorio de Polonia

O Ministerio de Defensa de Rusia declarou que non planeaba atacar obxectivos no territorio de Polonia, en resposta ás acusacións sobre unha incursión con drons no espazo aéreo polaco.

"Non se planeaba alcanzar obxectivos en territorio de Polonia", sinala o comunicado castrense publicado en Telegram.

O Kremlin criticou que a Unión Europea e a OTAN acusen "diariamente" a Rusia de "provocacións", en resposta ás acusacións de que drons rusos violaron o espazo aéreo de Polonia.

"Os dirixentes da UE e a OTAN acusan diariamente a Rusia de provocacións. Na maioría das ocasións sen nin sequera tentar presentar argumentos", dixo Dmitri Peskov, portavoz presidencial.

A operación de derruba de drons durou toda a madrugada. 

A violación do espazo aéreo polaco obrigou ao peche temporal de catro aeroportos, o de Chopin de Varsovia, Varsovia-Modlin, Rzeszów-Jasionka e o aeroporto de Lublin, dos que a maioría puido reabrir a primeira hora da mañá. Polo menos dous aparellos impactaron contra o chan, e un deles danou o tellado dun edificio residencial na rexión de Lublin (leste).

A poboación foi alertada para que, se atopan drons derrubados ou fragmentos, non se achegue, non os toque nin os mova antes de ser revisados polas patrullas de artificieiros. 

O primeiro ministro polaco, Donald Tusk, dixo este mércores ante o Parlamento que, tras a violación do espazo aéreo por parte de drons rusos, estase máis preto dun conflito aberto que en ningún outro momento desde a Segunda Guerra Mundial".

"Polonia ten un inimigo político máis aló da súa fronteira oriental", subliñou.

Tusk informou de que en total detectáronse "19 violacións do espazo aéreo" e que "por primeira vez durante esta guerra (de Ucraína), os aparellos non proviñan de Ucraína, senón de Belarús", e subliñou que as incursións "non pode dicirse que fosen o resultado de erros, perda de control de drons ou pequenas provocacións rusas".

Respondía así a Pável Muraveiko, xefe do Estado Maior do Exército bielorruso, quen asegurara que os drons puideron perder o rumbo debido á actuación dos sistemas de loita radioelectrónica rusos e ucraínos.

"Por primeira vez, unha parte significativa destes drons sobrevoou Polonia directamente desde Belarús", sinalou o primeiro ministro.

Tusk, afirmou que foi a primeira vez que drons rusos tiveron que ser derrubados sobre territorio dun estado membro da OTAN, e por iso os aliados toman moi en serio a situación, que cualificou de probable provocación a grande escala por parte de Rusia.

En contacto cos aliados da OTAN

Tusk indicou que está en contacto cos aliados e o secretario xeral da OTAN, Mark Rutte, para poder responder a este tipo de ameaza coa mesma eficacia desta noite, coa axuda tamén de cazas F-35 neerlandeses e o apoio do Mando Aéreo da OTAN, e nas próximas horas, días e de aí en diante.

"A situación é grave. Hoxe ninguén pode dubidar de que debemos prepararnos para diversos escenarios", declarou o primeiro ministro. "Estamos preparados para repeler tales provocacións e ataques", salientou.

Tusk,anunciou, tras a violación do espazo aéreo por parte de drons rusos, que invocará o artigo 4 do Tratado da OTAN, que contempla que os aliados "se consultarán cando, a xuízo de calquera deles, a integridade territorial, a independencia política ou a seguridade de calquera das partes fose ameazada.

Dixo ante o Parlamento que a invocación do artigo 4 "é só o principio" e subliñou que espera un "grande apoio dos aliados ante "a confrontación que Rusia declarou ao mundo libre".

A alta representante da Unión Europea para Asuntos Exteriores e Seguridade, Kaja Kallas, afirmou que hai indicacións que suxiren que o ataque ruso con drons que afectou esta madrugada a Polonia foi intencionado. A xefa da diplomacia comunitaria afirmou estar en contacto co secretario xeral da OTAN, Mark Rutte, e o ministro polaco de Exteriores, Radek Sikorski.

"A UE solidarízase plenamente con Polonia. A guerra de Rusia está a intensificarse, non a terminar", advertiu, e pediu aumentar o custo para Moscova, reforzar o apoio a Ucraína e investir na defensa de Europa.

Rusia lanzou deliberadamente contra Polonia polo menos oito drons, segundo Zelenski

Rusia lanzou de forma deliberada contra territorio polaco polo menos 8 drons kamikaze Shahed, segundo denunciou este mércores nas súas redes sociais o presidente ucraíno Volodimir Zelenski, que dixo que este ataque ruso que obrigou a Polonia a utilizar as súasdefensas aéreas por primeira vez nesta guerra non foi un accidente e supón un novo nivel de escalada por parte do Kremlin.

"Moscova sempre forza límites do posible, e se non atopa unha reacción contundente queda no novo nivel de escalada. O de hoxe é un novo nivel de escalada: drons ruso-iranianos Shahed operando no espazo aéreo de Polonia, no espazo aéreo da OTAN", escribiu Zelenski.

Rusia empregou en total neste ataque contra Ucraína que se estendeu a Polonia máis de 40 mísiles balísticos e de cruceiro e 415 drons, segundo o presidente ucraíno.

Segundo a Forza Aérea ucraína, as súas defensas aéreas lograron neutralizar 386 dos drons e 27 dos mísiles. Dezaseis drons e 21 mísiles non puideron ser interceptados e impactaron en 17 localizacións distintas en Ucraína. Unha persoa morreu na rexión de Zhitomir de Ucraína central como consecuencia do ataque. "Non foi un só shahed", dixo Zelenski sobre os drons que cruzaron a Polonia. O presidente ucraíno dixo que polo menos oito drons de ataque ían dirixidos cara a Polonia.

Zelenski pediu máis sancións e que Ucraína reciba suficientes armas para frear a escalada de ataques aéreos por parte de Rusia. O presidente ucraíno sinalou que o ocorrido neste ataque é un precedente extremadamente perigoso para Europa.

Drons rusos xa caeran con anterioridade en territorio de países da OTAN veciños de Ucraína, pero é a primeira vez que un deles se ve obrigado a neutralizar vehículos non tripulados de Rusia.