Rueda urxe eleccións xerais e acusa a Sánchez de vivir nunha "realidade paralela"

O presidente da Xunta cualificou como un "clamor" a convocatoria de eleccións xerais e demandou ao presidente do Goberno que as convoque canto antes. Deste, dixo que vive "nunha realidade paralela".

Así se pronunciou ao ser preguntado pola entrada da UCO na sede de Ferraz polo 'caso Leire'. "A xente pídello, moita xente do seu partido", insistiu en relación a algunhas voces socialistas.

"E isto é o que cada vez máis dirán publicamente, é un sentimento de moitísimos españois, de moitísimos galegos, que así non podemos seguir", recalcou Rueda.

"Cando pensamos que o escándalo que coñecemos non pode ser superado, ao día seguinte xorde un escándalo xudicial aínda máis grave", remarcou o titular do Executivo galego, que aludiu, ademais, a "todo o que está por vir", en referencia aos xuízos pendentes, entre eles o da muller do titular do Executivo central.

Neste contexto, cualificou a Sánchez como un presidente do Goberno "totalmente á defensiva".

"Parece que vive nunha realidade paralela, onde todo isto parece unha broma, e non, non é unha broma para nada", insistiu.

"Isto, ademais de todo o que implica desde o punto de vista ético, desde o punto de vista das posibles responsabilidades penais, é a imaxe dun Goberno, é o día a día dun Goberno que non está a gobernar", recalcou tamén.

Por outra banda, Rueda, que subliñou que non se pode "seguir" deste xeito, preguntouse quen está agora mesmo "ao temón das grandes decisións que se teñen que tomar dentro do Goberno central e que nos afectan a todas as comunidades autónomas, e, polo tanto, tamén afectan os galegos".

Por todo iso, recalcou que espera que "canto antes" Sánchez se dea conta "de que só hai unha saída, darlle voz aos españois para que digan se queremos seguir así ou se queremos cambiar", expuxo para considerar que apostarán polo cambio.