Rueda prevé un impacto menor en Galicia polos novos aranceis dos Estados Unidos

O presidente da Xunta, Alfonso Rueda, afirmou este mércores que o impacto dos novos aranceis anunciados polos Estados Unidos será menor en Galicia que noutras comunidades autónomas.

Segundo indicou, as exportacións galegas cara ao mercado estadounidense representan só o 2,6 % das vendas ao exterior. Esta porcentaxe, di, sitúa a comunidade nunha posición menos exposta fronte ás novas medidas comerciais.

Rueda recoñeceu que o sector agroalimentario será o máis afectado. En concreto, sinalou o viño galego, que “estaba tendo unha magnífica entrada” no mercado estadounidense.

Con todo, insistiu en que os efectos serán limitados en termos cuantitativos, especialmente se se compara con outras rexións españolas ou países da Unión Europea.

Rueda sinalou que aínda é pronto para facer valoracións definitivas. Considera necesario recompilar máis información, analizar a letra pequena do anuncio feito por Washington e coñecer cal será a resposta institucional.

Adiantou que se abre “un período intenso”, no que non pretende “rebaixar a preocupación”, pero si achegar datos que poidan axudar a contextualizar a situación.

O presidente puxo en valor que Galicia acadou en 2023 un récord histórico de exportacións, superando os 31.000 millóns de euros.

Tamén quixo agradecerlle ao presidente do Goberno, Pedro Sánchez, a súa disposición para coordinar coa Xunta e co resto de comunidades unha resposta común ante os aranceis. Cualificouna de “boa iniciativa” e defendeu que a resposta sexa “global, como país e como Unión Europea”.

Por último, lamentou que esta cooperación non se estenda a outras cuestións que, segundo el, tamén son demandadas polas comunidades autónomas.